Warbaahinta DEEYOO waxay mar kasta diyaar idinla tahay in ay idin soo gudbiso warbixino oo aan is leenahay waa kuwo xiiso galin kara aqristayaasheenna ku xeran warbaahintan,Maxaase kala socotay heerarka kala duwanaa ee midab takoorka kubadda cagta Spain.

 Kubadda cagta qaaradda yurub ayaa waxaa ay tahay mid inta badan ay ka dhacaan jinsi faquuq lagula kaco qaar kamid ah xidigaha ku xamaasha kubadda cagta.

Dalal ku yaala qaaradda Yurub ayaa waxaa ay ahaayeen kuwo gumaysan jiray dalal badan oo ku yaala qaaradaha Afrika,Aasiya iyo Ameerika waxaana ay si xun kula kixi jireen dadkii xiligaa ku noolaa qaaraddaasi waxaana kadib caalamka laga waayay dal dal kale gumaysi kula kaca.

Waayihii dambe ayaa caalamka uu ku tilaabsaday horumar oo laga gudbay in dad si cad loo gumaysto waxaana xurnimo qaatay dalal badan oo caalamka kuwaas oo ku hoos noolaa dalal ay kamid yihiin Ingiriiska, Faransiiska, Talyaaniga, Portaqiiska, Spain iyo kuwo kale. waxaana dhacday in dadkii oo dhan ay heleen xornimo waxaana dhibaatada ugu xun la kulmayay dadka ku nool qaaradda Afrika kuwaas oo lagu takoorayay midabkooda.

 Meelaha ugu badan oo ay dadka isku dhex galaan ayaa waxaa kamid ah Sportiga oo noqday mid isku keena qoomiyado kala duwan waxaana jira wali dad kale oo aamisan ama ku takoora midabka Madoowga ah.

 Xiriirka maamula kubadda cagta caalamka ee FIFA  iyo Hay’adda kale ee Olombikada adduunka ee I.O.C  ayaa waxay isku dayeen in ay joojiyaan arrimaha jinsi faquuqa ku aadan iyagoo kasoo saaray qodobo ay ku sheegeen in looga hortagaayo oo ah in qofkii ku kaca arrintaas oo kale in ganaax uu mudaysan doonno.

Dalka Spain waa goobta ugu daran oo lagu dhibaateeyo cayaaryahanada gaar ahaan kuwa ku xamaasha kubadda cagta waxaana jira kooxo ku caanbaxay in ay aflagaadeyan xidigaha madoowga ah ee ka cayaara horyaalka Spain waxaana kamid ah xidigaha dhibaatooyin noocaas oo kale la kulmay xidigii hore ee kooxda Barcelona Ito’o.

Kooxda Atletico Bilbao waa kooxka dhisan dalka Spain waxaana ay taageerayaasheeda ay ku caan baxeen jinsi faquuq ay kula kacaan cayaartooyda madowga ah oo u cayaaraha kooxda kasoo horjeeda ee ay la cayaarayaan.

Kooxdan ayaa taariikhda waligeed aanan u cayaarin cayaaryahan madoow ah waana kooxda kaliya ee ka cayaarta horyaalka Spain oo aanan u safanin xidig Madoow. rikoorkaasina waa uu jabay waxaaana ay ahayd kooxda kaliya ee harsanayd oo spain ah oo aanan cayaarsiinin xidig madow dhamaan kooxaha kale waa ay u safteen.

Hadaba waxaan idin haynaa in kooxda Atletico Bilbao oo taageerayaasheeda ay sida weyn u necbaayeen xidig madow ah oo ay aflagaado u geysan jiray xidigaha madow ayaa waxaa dhacday in taariikhda markii ugu horeysay ay u sacbo tumaan oo ay taageeraan cayaaryan madow.

Magaca Jonas Ramalho waa mid ay waligood ay xasuusan doonaan taageerayaasha Bilbao kuwaas oo habeen Arbaco oo ay qamiis soo galayso uu garoonka u soo galay markii ugu horeysay.

Jonas Ramalho waxaa uu ka cayaaraa daafaca  waxaana uu u saftay kulan ay la cayaarayeen koox ka dhisan wadanka Jarmalka ee Werder Bremen kulan ka tirsanaa koobka Uefa Cup ee bishii December. 

Xidigaan ayaa waxaa uu yahay cayaaryahanka ugu da’da yar kooxda Attletico Bilabo waxaana uu yahay mid wanaagsan isagoo ku hellay booska xidigaha lagu soo bilaabay kulankaas kadib markii uu hergab kaga dhacay mid kamid ah xidigaha daafaca kooxda Bilbao iyo wadanka Spain ee Andoni Iraola..

Sidoo kale Cayaayahan Ramalho ayaa waxaa uu noqday cayaaryahankii ugu da’da yar ee ebed u cayaara cayaar caalami ah Naadiga Attletico Bilbao.

Xidigaan waa JONAS RAMALHO ayaa waxaa iska dhalay Aabe Angola ah iyo Hooyo Spain ah waxaana markii uu garoonka soo galay la yaabay dhamaan bahweynta cayaaraha oo aan aniga ka mid ahay kuwaas oo aanan filaynin in ay cayaarsiin doonto Bilbao xidig madow ah waxaana xidigaas uu horey ugu cayaaray wadanka Spain xulkisa ka hooseeya 17- sanno jirada waxaana sidoo kale cayaaryahankaan uu u cayaaray kooxda Bilbao isagoo 14 jir ah.

Waxay ahayd daqiiqad xusuus u leh dhamaan maamulka iyo  taageerayaasha  naadiga Atletico Bilbao maadaama uu jabay rikoor u yiilay naadiga isla markaana ay u sacbo tumaan ama ay taageeraan xidig madow ah waana taageerayaasha ugu necbaa cayaartooyda  madowga ah.

 Kooxdan Atletico Bilbao ayaa waxaa ay ka mid tahay saddexda Naadi ee anan waligood dib ugu laabanin heerka 2-aad dalka Spain waxaana soo raaca Real Madrid iyo Barcelona.

Naadiga Atletico Bilbao ayaa waxaa ay ku guulaysatay horyaalka Spain ilaa 8 jeer waana kooxda Afaraad ee ugu guulaha badan ama ugu qaadista badan horyaalka Laliga Spain inkastoo sanadkii ugu dambeeyay oo ay qaaday uu ahaa muddo haatan laga joogo 26 sanno waxayna ahayd 1984.

 Kooxdan ayaa waxay ku sigatay dhowr jeer in ay heerka 2-aad u laabato laakin waa ay ka badbaadaysay waxaana natiijadii ugu wanaagsanayd ama markeedi ugu wanaagsanayd ee ay ku sigatay in ay qaado horyaalka Spain ay ahayd 1998 oo kaalinta 2-aad ay ka gashay waxaana sanadkaan ay kaga jirtaa kaalimaha dhexe.

Kooxdan Bilbao waxay ka dhisan tahay gobolka Basque waxaana uu yahay gobolkaan goob ay ku badan yihiin ama ay ku xoogan yihiin dadka cadaanka ah ee neceb dadka madoow inkastoo 15-kii sanno ee tagay gobolka Basque ay soo gaareen dad socoto oo u badan qaaradda Afrika kuwaas oo magan galyo doon ah.

Kooxdan ayaa waxaa jira in ay aamin sanyihiin fikirka ah in ay soo saaraan ama ay u cayaaraan cayaaryahano kasoo jeeda gobolka Basque waxaana xidigaha haatan u cayaara ay u dhasheen gobolkaan ama ay waalidkooda ay kasoo jeedaas sida hooyadooda.

 Tababaraha kooxdan waxaa lagu magacaabaa  Joaquin Caparros waxaana uu inta badan la dagaal sanyahay saxaafadda iyadoo Naadigaan ay ku faani jireen in ay soo saaraan cayaaryahano tayo leh oo kasoo baxa gobolkaan laakin sanadihii dhawaa la waayay su’aalaha noocaas marka ay waydiiyaan saxaafadda uu la dagaalo isagoo aanan jecleyn in uu war siiyo saxaafadda.

Jonas Ramalho ayaa waxaa suura gal ah in taageerayaasha ay ku kala qeybsamaan in kooxda uu u sii cayaaro xidid madow iyo in kale iyadoo suura gal ay tahay in cadawtooyo uu kala kulmo taageerayaasha naadiga.

Cayaaryahanada madowga ah ayaa waxaa ay ka cayaarayeen horyaalka La liga Spain tan iyo bartamihii 1950-meeyadii iyadoo ay ka imaan jireen koofurta Ameeriko laakin sanadihii dambe ayaa waxaa dhacday in qaaradda Afrika xidigo ka socda ay ka cayaaraan halkas iyo kuwo kale oo madow ah laakin heysta dhalashada qaar kamid ah dalalka qaaradda Yurub,waxaana wali jira in kooxaha Spain ay juunyarkooda ay ku jiraan cayaaryahano madow ah.

Waxaa jira kaliya afar cayaaryahan oo madow ah kuwaas oo ka tirsan xulka qaranka wadanka Spain waxaana kamid ah Marcos Senna oo u cayaara Kooxda Villarreal kana soo jeeda dalka Brazil.

Kubadda cagta spain ayaa waxaa la sheegaa in wali ay ku dambeyso cunsuriyad iyadoo la xasuusto in taageerayaasha kooxda Barcelona ay aflagaado u geysteen gool haya kooxda Espanyol iyo xulka Cameroon Carlos Kameni.

Xidigaha la kulmay dhibaatada ugu badan ee dhanka jinsi faquuqa ayaa waxay kala yihiin weeraryahankii hore ee kooxda Barcelona Samuel Eto'o iyo daaficii hore ee kooxda Real Madird Roberto Carlos kuwaas oo isbuuc dhaad la kulmaya Aflagaadooyin marka ay kusoo cayaarayaan meel ka baxsan garoomada Naadiyadooda xitaa mararka qaar loogu geysto garoonkooda.

Samuel Eto'o ayaa waxaa uu ku hanjabay in uu isaga baxaayo garoonka kadib markii uu u dul qaadan waayay aflagaada uu kala kulmay taageerayaasha kooxda Real Zaragoza sanadkii 2006 waxaana dhacday in xiriirka Spain uu ganaaxay kooxdaas lacago dhan ganaax ah oo dhamaa 9 kun oo Euro.

 Sidoo kale cayaaryahanada xulka qaranka ingiriiska ayaa waxay iyana kala kulmeen taageerayaasha Cunsuriyada ay dishay ee reer Spain aflagaado kulan dhexmarayay dalka Spain iyo England.

Xidigaha u dhashay wadanka Ivory Coast ee kala ah Felix Ettien, iyo Idrissa Keita ayaa waxay ku biireen kooxda Levante kadib markii cayaaro wanaagsan ay kasoo bandhigeen koobka juunyarka da’dooda ay ka hooseeyso  20-ka sanno ee adduun sanadkii 1997.

Xidigahaan ayaa waxay la kulmeen takoor xoogan oo xitaa ay kala kulmeen Tababaraha kooxda Levante waxaana ku adkaa luqadda Spain waxaana ay sheegeen in ay go’doon galeen oo iyaga oo kaliya ay isla hadlaan cayaaryahanada kale ama maamulka aysan la hadleynin waxaana uu tababaraha nagu tilmaamay in aan nahay Masiibo kooxda lasoo darastay.

 Waxaa ay intaa raaciyeen markaan xanuun sanno cayaaaryahanada iyo taageerayaasha waxay na yiraahdaan waxay qabaan cudurka dilaaga ah ee AIDS ama kii noogu wanaagsan wuxuu yiraahdaa ma qabaan AIDS ee waxaa Heysa Malaariyo ama cuduro kale xitaa waxay sheegeen in aanan qofna u soo dhawaan jirin oo layska dhowri jiray.sidaa waxaa shaaca ka qaaday Felix Ettien sanadkii 2004 waraysi lala yeeshay.

Hadaba xidiga garabka kaga cayaari jiray xulka wadanka Ivory Coast iyo kooxda Levante ee dalka Spain Felix Ettien ayaa waxaa uu sheegay in uu Jonas Ramalho uusan la kulmaynin dhibaatadii ay kala kulmeen dalka Spain iyagoo lagu takoorayay midabkooda waxaana uu sheegay in markii dambe ay gudbiyeen dacwad iyagoo ku hanjabay in ay ka tagayaan kooxda Levante laakin markii dambe wax weyn ay iska badaleen iyadoo loo ogolaaday in ay cunada kula cunaan suxuunt (plates) iyadoo markii hore weel gooni ah wax lagu siin jiray isla markaana dhar gooni ah loo xeri jiray marka aanan cayaar jirin oo ay joogaan xarunta kooxda isagoo qiray in waayo adag oo jinsi faquuq kubadda cagta Spain ay soo martay.