Xiddigihii ugu cadcadaa tartankii dhamaaday ee Euro 08.

07.2008, deeyoo.com.

     Saaxiibayaal waxaan halkan idinkuugu haynaa liis ka kooban 10 ciyaariyahan oo aan dhihi karno waxa ay ahaayeen kuwii ugu cadcadaa intii uu socday tartanka, waxaa dhici karta in dadku kala aragti duwanaan karo, ha noqoto hab ciyaareedka uu jecelyahay amaba koox/dal uu ka helo ciyaartoydiisa, laakiin waxa aan liiskan ku xulnay aragti ah, hab ciyaareed, kulamadii ay ciyaareen ciyaartoydan iyo guulaha ay ka gaareen intaba, tusaale Spain ayaa ku leh 4 ciyaartoy liiskan, waayo waa dalkii ku guuleystay koobka, arintani waa mid iska caadi ah oo dhacda mar walba.

Marka sida ay idinla tahay iyo hadii ay jiraan ciyaartoy ka maqan ama kuwa si qalad ah halka ugu jira, waxaan kaga doodi karnaa bogga dooda sportiga, haddii alla yiraahdo.

Waa kan liiska oo aan kor kasoo bilownay min 10 ilaa iyo 1.

	NO:10. Cesc Fabregas. Spain. Inkasta oo uu inta badan lagu bilaabayay kursiga keydka ama bankiine, hadana waxa uu lafdhabar u ahaa kooxda hanatay koobka ee spain, gaar ahaan ciyaartii semifinalka.
	NO:9. Wesley Sneijder. Holland Waxa uu dhaliyay laba gool oo aan weli ka go'in xasuusteena, welibana ka kala dhaliyay Italia iyo France, Sneijder waxa uu ahaa matoorki ay ku dhaqaaqeysay Holland.
	NO:8. Gianluigi Buffon. Italia. Xulkiisa Italia waxaa lagu reebay rigoorayaal, laakiin Buffon waxaa la dhihi karaa isaga ayaa soo gaarsiiyay meeshii ay soo gaareen, gaar ahaan, goolashii uu ka badbaadiyay.
	NO:7. Lukas Podolski. Jarmalka. Weeraryahankan ayaa ahaa kii ugu goolasha badnaa jarmalka isaga oo dhaliyay 3 gool, waxa uu muujiyay inuu yahay nin ay jarmalku ku xisaabtami karaan mustaqbalka.
	NO:6.  Semih Senturk. Turkiga. Waxaa la dhihi karaa waxa uu ahaa mucjisadii ciyaarahan maadaama oo dhaliyay 3 gool oo uu wada dhaliyay dhamaadkii ciyaarta, switzerland, Croatia iyo Jarmalka ayuu ka naxsaday Senturk.
	NO:5.Fernando Torres. Spain. Si qabow ayuu ku bilaabay tartanka, balse waxa uu noqday ninka ay reer spain oo dhan magaciisa ku heesayaan maadaama uu dhaliyay goolkii ay koobka ku qaadeen.
	NO:4. Andrei Arshavin. Ruushka Labadii kulan ee ugu horeeyay wuu ka maqnaa ruushka, laakiin markii uu soo noqday kulankii Sweden iyo wixii ka danbeeyay waxa uu muujiyay farsamo, goolal iyo tikniko lala yaabay.
	NO:3. Michael Ballack. jarmalka Hogaamiye dhab ah iyo khibrad ayuu muujiyay kabtan Ballack, waxaa si aad ah loogu xasuustaa goolkii uu ka dhaliyay Austria oo lala yaabay xawaaraha uu ku socday.
	NO:2. Marcos Senna. Spain Magaciisa si aad looma aqoon, loogamana sheekeyn sida xidigaha kale ee Spain laakiin waxa uu ahaa ninkii ugu muhiimsanaa ee garoonka usoo kala kooxda horyaalka.
	NO:1. David Villa. Spain Wuu ka maqnaa ciyaartii Finalka laakiin Villa waxa uu noqday gooldhaliyihii tartanka, waxaa lagu wada xasuustaa 3dii gool uu ka dhaliyay Ruushka, iyo weliba hab ciyaareedkiisa weyn.

M,deeq

deeyoo2003@hotmail.com.

deeyoo_edit@hotmail.com

 
 Halkan riix si aad deeyoo.com uga dhigato bogga hore