Taariikhda xidigaha Soomaaliyeed

Aweys Haji Osman iyo taariikhdiisa kubadda cagta

27.07.2008, deeyoo.com

Cayaaryahan Aweys Xaaji Cusmaan ee loo yaqaan Seyga (6) Batroolka kana ciyaari jirey khadka dhexe ama N. 6aad ee naadiga Batroolka wuxuu dhashey sannadkii 1965 wuxuuna ku dhashey Magaalada Muqdisho Degmada  Xamar Jajab wuxuu waxbarashada quraanka kariimka ah ku bilaawey isla magaalada muqdisho .

Wuxuu yaraantiisa aad iyo aad u jeclaa cayaaraha gaar ahaan kubbadda cagta isagoo nasiib u yeeshay inuu ka dhasho qoys aad u xiiseeya ciyaaraha gaar ahaan kubbadda cagta, Waxaana ku dhiira geliyey Cayaaraha Waalidiintiisa .

Wuxuu waxbarashadiisa dugsiga hoose dhexe markiisa hore ku bilaawey dugsiha 21ka Oktoobar isagoo aakhirkii uu ku wareegay dugsiga hoose dhexe ee Hodan wuxuuna dhameeyey sannad dugsiyeedkii 1978-79 .

Waxbarashadiisa ayuu halkaasi  ka sii wadey wuxuuna waxbarashada dugsiga sare uu ku bilaawey kuna dhameystey Dugsiga sare ee Raage Ugaas sannad dugsiyeedkii 1983-84 .

Inta uu waxbarshada ku jirey Cayaaryahan Aweys Xaaji wuxuu ka qeyb galey tartamada ciyaaraha dugsiyada isagoo uu ciyaarayey dugsiga sare ee Raage Ugaas nasiibna u yeeshay inay hantaan koobkii tartanka dugsiyada sare ee sannadkii 1982 .

1983 ayuu waxuu ka mid noqdey Cayaaryahan Aweys Xaaji Junyeeriska Naadiga Batroolka isagoo ay ku wada jireen junyeriska cayaaryahanada kala ah Yacquub Axmed Maxamuud oo markii dambe ka mid noqdey Naadiga Waxool. Iyo ciyaaryahanda kala ah C/casiis daba gure Muqtaar yuusuf iyo cayaaryahno kale ,

Isagoo ku jira junyeriska naadiga Batroolka ayuu wuxuu ka mid noqdey ciyaaryahandii ka qeybgaley Tartanka Cayaaraha Gobolada sannadku markuu ahaa 1983 isagoo uu u ciyaarayey Gobolka Nugaal oo uu tababre u ahaa Cayaaryahankii weynaa Cabdalla Quuq , iyada oo uu gobolka nugaal kusoo harey wareegii koowaad ee Tartankaasi qeybtiisa lagu qabanayey Gobolka Hiiraan Magaalada Beledweyne .

Ka dib Cayaaryahan Aweys Xaaji waxa uu ku biirey sannadka markuu ahaa 1984 cayaaryahanada Heerka Koowaad ee Seria” A” kana mid noqdey Naadiga Batroolka . cayaartiisa koowaad ee heer Seria A uu cayaaro waxey aheyd ciyaar ay la yeesheen Naadiga Gaadiidka.

Waxaana Tababare u ahaa alaha ha u naxariistee Tababrihii weynaa caanna ka ahaa dalkeena Tababare Maxamed Cismaan (BUDIISTE )  iyo Macalin Cumar Abuukar .

Cayaaryahan Aweys Xaaji Guulaha ama Farxadaha oo uu la qeybsadey naadiga batroolka waxaa ka mid ahaa sannadka markuu ahaa 1985 iyagoo ku guuleystey Koobkii Jeneral Daa’uud oo ciyaarta finalka aheyd ay isaga horyimaadeen Naadiga Madbacadda oo ay kaga badiyeen 2 : 1 oo goolashaasina uu dhaliyey ciyaaryahanka  weyn Maxamed Cumar Abuukar (FOKAWA) .

1985 waxaa loo magacaabey ciyaaryahanda Junyeerka Qaranka oo tababre u ahaa Tababarihii reer Gaana laguna magacaabi jirey Charles Kumi oo ay somaalida u taqaaney CK .

Isla Sanadkaasi 1986 waxa uu naadiga batroolka oo uu ka tirsanaa Ciyaaryahan Aweys Xaaji kaalinta labaad ka galeen tartankii Horyaalka Kubbaada Cagta .

Waxa uu naadiga batroolka uu nasiibka u yaashay inuu kaalinta labaad uu ku matelo tartanka isreebreebka koobka bariga iyo bartamaha afrika . Wadamadii uu kusoo ciyaareyna waxaa ka mid ahaa Wadanka Kenya iyo Burundi iyo Uganda .

1988 cayaaryahan Aweys Xaaji waxaa loo magacaabey ciyaaryahanda Xulka Qaranka ee Soomaaliya .

1989 cayaaryahan Aweys Xaaji wuu  kasoo dhoofey wadanka isagoo usoo hayaamay Boqortooyada Sacuudi Carabiya, Kamana uusan fariisan Ciyaaraha halkiisa ayuu ka sii wadey oo ilaa iyo hadeertaan uu ka mid yahay guddiga Qabanqaabada Ciyaaraha ee jaaliyadda Soomaaliyeed ee boqortooyada Sacuudi Carabiya isagoo ah Wakiilka guddiga Ciyaaraha ee Jaalliyada  ee Magaalada Khobar, Damam .

Ciyaaryahan Aweys Xaaji farxadda uu la qeybsadey naadigiisa Batroolka waxaa ka mid ahaa Tartankii Koobka Jeneral Daa’uud iyo Koobab munaasabado badan sida 1da Luulyo iyo Koobkii weynaa ee shirkadda Dayuurdaha soomaaliyeed ay Dhigtey SOMALI AIRLINES .

Ciyaarahayan Aweys wuxuu aad u jeclaa had iyo jeer inay garbihiisa buuxiyaan ciyaaryahanda kala ah Maxamed Cumar (Folkawa) , Muqtaar Cutti, C/casiis Dabagure , Cismaan Xasan , Senigal,Deysane, C/xakiim, Khaalid , Shabeel, Jubba, C/raxmaan Guuleed Cawaale, ,  Cabey iyo dhammaan ciyaaryahanda Naadiga Batroolka guud ahaan .

Cayaaryahan Aweys Xaaji Waa Xaasle lehna Lix Caruur kuna nool Boqortooyada Sacuudi Carabiya.

waxaadna  ka helin kartaa Emailadan soo socda :

basaroole@gmail.com,
jedsomsport@gmail.com  ama
jedsomsport@hotmail.com

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore