|
|
|
|||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||
|
Sacid Cayrow
" Xulka kubada cagta waa in laga xulaa gudaha dalka 02.08.2008, deeyoo.com Saciid Ceyrow oo caanka ah bulshada isboortiga Soomaaliyeed kana mid ah raga sida aadka ah ugu mashquulsan horumarinta isboortiga Soomaaliyeed ayaan kula kulanay magaalada Leicester ee dalka Ingiriiska oo dhowaan lagu soo gabagabeeyey tartankii xiisaha lahaa ee Eurosom 2008. Siciid Ceyrow oo tababare u ahaa kooxda Waaberi oo ka dhisan xaafada Streatham ee magaalada London ayaa waxaa noo suura gashay inaan wareysi kooban kala yeelano aragtidiisa mustaqbalka kubada cagta Soomaaliya. - Tan iyo markii aan imid dalka Ingiriiska waxaan aad ugu mashquulsanaa inaan qibradeyda isboorti usii gudbiyo dhalinta soo koreysa waxaana soo leyliyey 5 koox intii u dhexeysey 1999 ilaa waqtigan la joogo waxaana ka mid ahaa kooxihii aan soo leyliyey Jeenyo, Iftin, LCF London iyo Waaberi oo aan ilaa iyo hada macalin u ahay ayuu ku jawaabay Siciid Ceyrow oo aan weydiinay bal inuu weli ku dhex jiro isboortiga Soomaaliyeed oo xiligii uu ciyaarayey ahaa nin aad uga dhex muuqdey kooxdiisii Horseed iyo xulkeenii qaraka. Mar aan weydiinay farqiga u dhexeeya xiligii uu ciyaaryahanka ahaa iyo dhalinta maanta wuxuu ku jawaabay in waqtigii uu ciyaaryahanka ahaa uu isboortigu balwad iyo shaqo u ahaa iyagoo waqtigooda inta badana ku dhumin jiray isboortiga hase yeeshee ay dhalinta maanta badankood aysan shaqo u arkin isla markaana uu waqtigooda ciyaaraha aad u yaryahan maadaama ay u badan yihiin arday iyo shaqaale muruqmaal ah.
- Hadii la helo ciyaaryahan Soomaaliyeed oo caan ah kana ciyaara garoomada caalamiga ah wey suura geli laheyd in la helo ciyaaryahano kale oo farabadan oo Soomaaliyeed oo tiigsada halka uu walaalkood gaaray laakiin inta ka horeysa rajada ay ciyaaryahanada Soomaaliyeed ka qabaan iney mustaqbal wanaagsan ka gaaraan isboortiga ilama badna ayuu ku jawaabay Siciid Ceyrow oo aan weydiinay sababta dhalinta maanta aysan shaqo uga dhigan isboortiga oo marka la fiiriyo xiligii uu ciyaarayey iyo hada ay aad u kala duwan yihiin xaga dhaqaalaha iyadoo ciyaaryahano badan ay qaataan 100 kun oo pound todobaadkii halkii ay xooga ka saari lahaayeen shaqooyin kale oo ugu badnaan ay helayaan 15 kun ilaa 20 kun sanadkii. Saciid Cayrow oo aan weydiinay maadaama uu inta badan daawanayey kulamadii Eurosom inuu u maleynayo ciyaaryahanada qaar iney u qalmaan xulka qaranka Soomaaliya ayaa aad ugu dheeraaday amaanta uu usoo jeedinayey dhalinta isboortiga maanta isagoo tilmaamay in ciyaaryahano badan oo tartankaan ka qeyb galay iyo kuwo kale oo ka maqan intaba ay u qalmaan iney boos ka helaan xulkeena Soomaaliya laakiin xaaladaha maanta jira awgood uuna talo ahaan soo jeedineynin in lagu daro qaranka Soomaaliya.
- Xulka qaranka Soomaaliya waxaan qabaa in dhamaan laga qaato gudaha Soomaaliya maxaa yeelay sida runta ah waxaa imaanaya cuqdad ay kala qabaan labada dhinac iyo isla qabsi la`aan hadiisi la heli karo in ciyaartoyda dibada laga qaadanaayo ay qiyaastii mudo 3 bil ah tababar la qaadan karaan kuwa gudaha oo ay helaan waqti ay isku bartaan isla markaana ay is ciyaar fahmaan waa Okey laakiin taas in la helo wey dhib badnaaneysaa xaalada Soomaaliya ka jirta awgeed iyo ciyaaryahanada dibada oo ay dhib ku noqoneyso iney helaan fasax dheer maadaama ay arday ama shaqaale u badan yihiin ayuu ku jawaabay Siciid Ceyrow su`aal aheyd sababta uu ugu diidayo mar hadii farsamo ahaan iyo jir ahaanba ay u qalmaan iney u saftaan qaranka Soomaaliya. Saciid Cayrow ayaa weydiinay Siciid ahaan sida uu u arko hadii qaranka Soomaaliya lagawada qaato banaanka sida tusaale ahaan qaranka Iraq oo dhowaan ku guuleystay tartankii qaramada qaarada Asia iyadoo ciyaaryahanadii magacooda ku ciyaarayey mid keliya uu ka yimid gudaha Iraq inta kalena dibada lagasoo uruurshay ayaa si weyn uga soo horjeestey fikirkaas wuxuuna sheegay in taas macneheeda tahay hala xabaalo isboortiga Soomaaliya oo ciyaaryahanada hada ka ciyaara horyaalka Soomaaliya rajo ka qabaan iney boos ka helaan xulka qaranka taasoo magac ahaan iyo dhaqaale ahaanba ay niyada ku hayaan hadiisa aysan jirin meel ay hiigsadaan waxaa adkaaneysa in lasii wado horyaalka Soomaaliya hadii uu horyaalka istaagana waxaa wada istaagaya dhaqdhaqaaq kasta oo isboorti oo Soomaaliya hada ka jira.
- Rageenii hore ee isboortiga kusoo dhex jiray waxaa moodaa in hada noolaga horeeyo abaabulka iyo isku dubaridka isboortiga Soomaaliyeed laakiin waa wax wanaagsan qofkii doonaba haka timaadee iney jiraan rag u taagan horumarinta isboortigeena oo si gaar ah aan u tilmaamayo hogaanka Eurosom oo runtii ku dayasho mudan isla markaana la iska ilaaliyo dano dhaqaale in lagu fushado isboortiga taasoo marka dambana lagu kala tago iyadoo hadii ay soo noqnoqotana laga yaabo in dhalinyarada niyada u heysa ciyaaraha ay ka niyad jabaan qofkasta oo isku daya inuu si run ah ugu adeego isboortigeena ayuu ku jawaabay Sicid Ceyrow mar aan kula kaftamay in ragii hore ee isboortiga caanka ku ahaa lagaga horeeyo abaabulka tartamada isboortiga iyo loolanka hogaanka isboortiga Soomaaliya. Saciid Ceyrow ayaa ugu dambeyn ka gaabsadey inuu amaano ama dhaleeceeyo hogaanka XSKC, GOS iyo tusaale ahaan garbihii kala jajabay ee ciyaarihii xiisaha lahaa ee Stockholm isagoo bedelkeeda ka codsadey in shakhsi kasta oo Soomaaliyeed oo ku dhex jira isboortigeena dalka gudihiisa ama debadiisaba iney si daacadnimo ah ugu shaqeeyaan isboortiga. - Walaalayaalow isboortiga yuu noqon mid aad ku gaartaan danihiina gaarka ah ee ha noqdo mid aad wax walba u hurtaan horumarkiisa wax walbana ka hormarisaan ayuu ugu dambeyn talo ahaan usoo jeediyey Sacid Hassan oo inta badan loogu yeero Sacid Cayrow
Waxaa wareystay |
|
|||||||||||||||||||||||||||||||||||||||||||||
