|
|
|
|||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||
|
|
|||||||||||||||||||||||||||||||||||||||||||||||
|
Ciyaar K/Cagta ah oo lagu maamuusayay halyeyga Isboorti Nuur Jenyo oo ka dhacday Garoonka Stadium Conis ee Magaalada Muqdisho.
Tartanka ciyaaraha Isboortiga ee lagu maamuusayo halyeyga Isboortiga Soomaaliyeed Md. Nuur Jenyo ayaa si xowli leh uga socdo xiligaan dhammaanba Garoomada Ciyaaraha gobolka Banaadir waxaa mid ka mid ah ciyaarahaasi oo ahayd K/Cagta ka dhacday Stadium Conis ee Magaalada Muqdisho, iyadoo daawashada ciyaartaasina ay ka soo qeyb galeen madaxda qeybaha kala duwan ee Isbootiga Soomaaliyeed iyo midka xiriirada kala duwan ee Bahda Sportiga , sidoo kalena waxaa ka soo qeyb galay madax ka socotay maamulka G/Banaadir, marti sharaf iyo dadweyne aad u fara badan. Tartankan oo dhex maray labada kooxood ee lagu kala magacaabo Elman VS SITT, ayaa labada kooxood waxa ay kusoo bandhigeen ciyaaro aad u xiiso geliyay daawadayaashii ciyaartaasi, waxaana kaambiyadii hore ee ciyaarta ay ku dhammaatay kooxda SITT oo iyadu ku hor martay goolkii ugu horeeyay SITT 1-0 Elman oo diiday inay bareejeeyaan, hase yeeshee kaambiyadii dambe ayaa ciyaarta waxay noqotay mid xamaasadeedu aad u sarreyso.
Ciyaarta oo socotay kaabiyada dambe daqiiqado dhowr ah kaddib kooxda Elman waxay shabaqada kooxda SITT dhaafisay kubaddii, sidaasna ay ku bareejeysay goolkii iyada looga hor maray markii hore, waxaana kooxda Elman ay la soo baxday dardar ciyaareed aan hore loo arag, taasoo u suurtagelisay in iyadoo xilliga ciyaarta ay ka dhiman yihiin muddo 15-daqiiqadood ah ay mar labaad shabaqa kooxda SITT dhaafsiiyeen markale Kubadda, sidaasna ay kaga badiyeen kooxdaasi, iyadoo ciyaarta ku soo gabagaboday 2-1 oo guusha ay ku raacday kooxda Elman.
Ciyaartaan oo dhacday 11-07-08 ayaa Madaxdii ka socotay xiriirada Isboortiga ee ka soo qeyb gashay ciyaartaasi oo ay ka mid ahaayeen Guddoomiyaha Gudiga Olombikada Soomaaliyeed C/qaadir Ibraahim Gacal Abkow, Aadan Xaaji Yabarow Wiish Guddoomiyaha Xiriirka K/Koleyga Soomaaliyeed iyo K/Xigeenkiisa Mr.Ibraahim Xuseen Cali Roombe, Guddoomiye K/Xigeenka Arimaha bulshada maamulka G/Banaadir Maxamed Cismaan cali dhagax tuur iyo Xubno kaqle oo dhammaantood aad ula riyaaqay qaab ciyaareedka ay soo bandhigeen labada kooxood, inkasta oo madaxda Xiriirada Isbooti ay sheegeen in ciyaartooyda looga baahan yahay inay kordhiyaan Aalamiintada ay qaataan, iyagoo macallimiinta labada kooxood ku booriyay inay sare u qaadaan tayada ciyaartooyda kooxahooga.
Dhinaca kale waxaa munaasabadda ciyaartaasi Guddoomiyaha Olombikada Soomaaliyeed Md. C/qaadir Gacal Abkow, Guddoomiyaha Xiriirka K/Koleyga Md. Wiish, Guddoomiye K/Xigeenka Xiriirka K/Koleyga Md. Roombe, kuwaasoo dhammaantood sheegay inay munaasabadani tahay mid qaali ku ah shacabka Soomaaliyeed, gaar ahaan Xiriirada Isboortiga dalka, iyagoo si kooban uga hadlay taariikhda Md. Nuur Jenyo oo ay ku sifeeyeen inuu ahaa halyeey Isboorti oo baal dahab ka galay taariikhda shacabka Soomaaliyeed iyo midka Isboortigaba.
Xasiiska Barnaamijyada deeyoo.com Muqdisho-Soomaalia
|
|
|||||||||||||||||||||||||||||||||||||||||||||
