Tartanka Olympic Games 08 oo si rasmi ah u furmay, iyo Soomaaliya oo ugu yaraan geysatay dad matala

09.08.2008, deeyoo.com

Waxaa si rasmi ah ugu furmay magaalada Beijing ee dalka Shiinaha ciyaarihii 29aad ee Olympic Games oo sida lasoo wariyey ahaa kii ugu quruxda badnaa taariikhda tartankan.

Madaxweynaha dalka Shiinaha Hu Jintao ayaa kaga dhawaaqay xafladii furitaanka in uu furunyahay tartanka Olympic Games 2008 garoonka weyn ee BUUL SHIMBIR STADION iyadoo ay goobjoog ahaayeen in kabadan 90 kun oo qof oo ay ku jiraan Madaxweynayaal, Ra`iisul wasaarayaal, Boqoro iyo dad kale oo magac ku leh aduunka.

Dalka Shiinaha oo siyaasad ahaan iyo dhaqaale ahaan ka go`doonsan reer galbeedka ayaa muujisey iney tahay dowlad weyn ee dalkeeda kusoo dhoweyn karta aduunweynaha oo idil iyagoo ku qarash gareeyey in kabadan 20 bilyan oo dollar.

Dalka Shiinaha oo lambarka 8aad u ah mid qiime gooni ah ugu fadhiya una yaqaanaan mid barakeysan ayaa nasiibkooda wuxuu tartankan qiimaha leh furitaankiisa kusoo aaday 08:08, 8da bisha 8aad 2008.

Li Ning oo ah nin si weyn looga xushmeeyo dalka Shiinaha horena ugu soo hoyey 3 bilad oo dahab ah ciyaarihii Olympikada 84kii lagu qabtay magaalada Los Angeles ee dalka Mareykanka ayaa shiday dabkii Olympic Games 2008.

Guud ahaan ciyaaryahanada ku tartamaayo tartankan ayaa gaaraya 11 kun iyadoo 639 ka mid ah ay ka socdaan dalka marti gelinaayo ee Shiinaha.

Dalkeena Soomaaliya waxaa noo matalaya ciyaarahan Abdinasir Saiid oo ah orda 5000 iyo 10000 mitir iyo gabadha 17 jirka ah Samiyo Yusuf oo oroda 400 iyo 800 mitir oo aan u rajeyneyno iney guulo kasoo hoyaan.

Tartankaan oo qeybo kala duwan leh waxaa ka mid ah kubada cagta oo ay sanadkaan ku tartamayaan 16 dal oo 4 gurub loo qeybiyey iyadoo xidigaha ka dhex muuqda ay ka mid yihiin Ronaldinho iyo Pato iyo Andersen oo Brazil, Messi oo Barcelona iyo Argentina, Requelme oo Argentina ah, Roy Makaay iyo Babel oo Holland ah.

Dalalka kubada cagta ee Yurub oo wixii ka horeeyey 1996kii inta badan ku guuleysan jiray bilada dahabka ah ayaa sanadihii ugu dambeeyey waxaa kala wareegay Afrika iyo Laatiin America iyadoo sanadkaana loo saadaalinaayo dalka Argentina oo difaacanaya bilada dahabka ah iyo Brazil oo aan hore ugu guuleysan tartankaan.

Dalka Hungrry ayaa ah dalka ugu badan ee qaata bilada dahabka ah iyagoo 3 jeer hore ugu guuleystay, dalalka Yurub ayaa 16 ka mid ah 21kii jeer ee hore loo soo qabtey tartankaan ku guleystay dalka Spain ayaana ahaa dalkii reer Yurub ee qaada koobka kubada cagta Olympic Games 1992kii markaasoo dalkooda lagu qabtay.

Afarta guruub ee loo qeybiyey 16ka dal ee sanadkaan ka qeyb gelaayo ayaa ah sidan hoos ku qoran:

Group A: Cote D'Ivoire , Argentina,  Australia, Serbia.
Group B: Netherlands, Nigeria, Japan, USA.
Group C: China, New Zealand, Brazil, Belgium.
Group D: Republic of Korea, Cameroon, Honduras, Italy l

Inkastoo si rasmi ah maanta loo furay tartankaan ayaa waxaa hore loo sii ciyaaray kulano ka mid ah kubada cagta iyadoo dalalka Brazil, Argentina iyo Talyaaniga oo ah wadamada looga baqayo iney hantaan bilada dahabka ah ayaa guulo ku furay isla markaana la wareegay hogaanka guruubada ay ku kala jiraan.

Kulamadii la ciyaaray waxey u dheceen sidan:

Cote D'Ivoire  1-2 Argentina,  Australia 1-1 Serbia
Netherlands 0-0 Nigeria, Japan 0-1 USA
China 1-1 New Zealand, Brazil 1-0 Belgium
Republic of Korea 1-1 Cameroon, Honduras 0-3 Italy
 

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore